شتوية ما كيفهاش جزء 1 بقلم رؤوف سليمان
شتوية ما كيفاهش
تذكرت أيام الثمانينات كيف كنت نسرح بالنعاج ساعات مع الوالد الله يرحمه وساعات نعدي النهار وحدي ويرافقني ولد العم " ملحاق" نسوق النعاج من الصباح حتى العشية ... نهز معايا كسرة خبز وشوي حليب والا زيت زيتونة والقشابية والا كبوت الباش على ما ياتي... نسوق النعجات ونشد الجبل حتى المغرب ...ينفخ الريح والا تصب المطر ما يعطلني شيء ... الحاجة الوحيدة الي نكرهها كيف تولدلي نعجة في السروح ...نهبل ونجن ...خاطر كان هزيت العلوش الصغير امو تشق الخلا... كان خليتهولها تبرك ترضع وما عادش تلحق الأخرين وترصيلي ندز فيها هي وولدها ...وتظلم علي الظلمة وانا مازلت ما وصلتش للدار ...الوالد يتغشش خاطر يخاف على النعجات من الذيب والوديان الحملة بالماء...يقلي موش قلتك روح بكري... نجاوبو ماهي النعجة الفلانية ولدت وما حبتش تبع... خير وبركة أش جابت .... جابت ذكر يشبه للكبش الصردي... رضعت ولدها تمشيش تنفر وترصي نعاني فيها راني نعرفك هامل وما يهمكش... والله رضعت بالقدا تعالى شوف ناشط ما شاء ... اي باهي ... اي سكر الزريبة بالباهي وحط عشاء الكلاب ... وامي واها ماهي مسانسة تعشيهم هي... راني مبلول ..منفخ...باهي عشي الكلاب وادخل اغسل ساقيك وبدل حوايجك...
نحط عشاء الكلاب حاشاكم وندخل نلقى الوالدة تسقي في العشاء والكانون يولعج والبراد يغلي .... صب كاس ياما ... اكهو مازال كان التاي ما تعلمتاش.. ما يزيكش الدخان يا ولد الكلب ... تحط الوالدة العشاء ...كسكي بالرغيدة والخضرة والخرشف.. نضربها قدقد ونسرق كاس التاي ونهرب للبيت الأخرى ...نشعل قارو كريستال ٠٠نجدت الكرطابة ونبدى نحضر لغدوة ... سويعة وسويعتين تطل امي مازلت ما رقدتش ...هاو الحصير مفرش.. تغطى مليح ...الليلة باردة ورد. بالك تعري خوك" على فكرة ما كانش عندنا أسرة ..كنا نرقدوا على حصير الحلفاء الي شاريه الوالد من السوق من عند التكروني " نسبة لقرية تكرونة" ....
وتتوالى الأيام ....
تعليقات
إرسال تعليق