راجع...راجع بقلم توفيق الغانمي
راجع راجع يا كورونا
راجع للقسم نقريهم
باش ما عادش يلومونا
على الراحة لي طالت بيهم
رڨدوا في الدار وما جونا
ذرارينا عدوها عليهم
قبضوا الشهرية وانْسونا
نشالله دعوة في ذراريهم
ه🔬📖💉💹🔬📐📏💉
راجع ومعايا المنديلة
هي ستري هي كفني
كان طحت يهزوني شيلا
يغطوني ولا من يكشفني
لا اصحابي لا حتى العيلة
يتبعني كي نغمض جفني
ه🔬📖💉💹🔬📏📐💉
راجع وسلاحي طبشورة
نحاول ننفعهم من عندي
نوضّح نكتب عالسبورة
سلاحي علمي كيف الجندي
لا خايف من موت الغورة
ولا عمري لسلاحي نْرَنْدي
نا راني ولد المعمورة
متغذي جرجيرة وهندي
حياتي عايش كيف صقورة
كي ينادوا نعطي لي عندي
لا نسرق لا نعمل غورة
لا نْسَكّر شارع لا نْبَنْدِي
ه🔬📖💉💹🔬📏📐💉
راجع راجع يا ڥيروس
راجع لتلامذتي نعلّم
واخذ بركاري والكوس
نبني نرسم حسب السُّلَّم
بين صفوف القسم نسوس
نكتب ونشجع ونكلّم
في جسم الإنسان نغوص
نوقظ في عقل المتعلم
ساعة طبيب شادد موس
نشرّح في الڨلب ونتألم
ساعة مهندس مبخوس
نقيس نبني نسطر ونخمم
لا جهدي تقدر بفلوس
عليا ديما الڨلب محمم
ه🔬📖💉💹🔬📏📐💉
راجع راجع شاد طريڨ
طريڨ لي حكموه رفاڨا
كل مرة فاڨدين رفيڨ
يخلف في ڨلوبنا شهاڨا
عملونا عودان حريڨ
كل مرة تسمع طرشاڨا
كالهادد ع طير الميڨ
بحجرة وثڨالا ومسواڨا
كثر فينا كان الدڨديق
بالفايسبوك مع اللهماڨا
ه🔬📖💉💹🔬📏📐💉
راجع راجع يا كورونا
راجع للقسم نقريهم
باش ما عادش يلومونا
على الراحة لي طالت بيهم
تعليقات
إرسال تعليق